AL’ƘALIN BABBAR KOTUN TARAYYA YA FICE DAGA SHARI’AR ZARGIN AL’MUNDAHANA
Alkali ya janye daga shari’ar Ali Bello ta zargin almundahanar ₦10bn kan zargin sauya shaida.
Mai shari’a James Omotosho na Babbar Kotun Tarayya da ke Abuja ya janye kansa daga ci gaba da jagorantar shari’ar Ali Bello, Shugaban Ma’aikata na Gwamnan Kogi, Usman Ododo, kan zargin karkatar da kuɗi da ya kai ₦10 biliyan.
Mai shari’ar ya yanke wannan shawarar ne bayan mai rajistar kotun, Nasir Zubairu Onimisi, ya amsa cewa ya sauya wani muhimmin abin shaida (Exhibit N) da hukumar EFCC ta gabatar a shari’ar. Al’amarin ya faru ne yayin da kotun ke shirin sauraron hujjojin lauyoyin Ali Bello da abokin tuhumarsa, Dauda Sulaiman, kan buƙatarsu ta no-case submission — wato cewa shaidun da masu gabatar da ƙara suka gabatar ba su isa a tilasta musu su fara kare kansu ba.
Mai shari’a Omotosho ya ce ya yanke shawarar janye kansa ne saboda ci gaba da shari’ar a ƙarƙashinsa na iya haifar da wasu fahimta da za su iya rage amincewar jama’a ga kotuna da tsarin gudanar da shari’a.
A cewar bayanin da kotun ta bayar, mai rajistar kotun ya taɓa amsa cewa ya sauya bayanan da ke cikin wata waya mai ɗauke da saƙonnin WhatsApp da suka shafi shari’ar.
An ce daga baya kotun ta umarci a binciki lamarin, ciki har da binciken na’urorin da bayanan sadarwar waɗanda ake zargi suna da alaƙa da lamarin.
Mai shari’ar ya ce Exhibit N na daga cikin muhimman shaidun da masu gabatar da ƙara suka dogara da su. Ya bayyana cewa idan ya ci gaba da shari’ar, duk hukuncin da zai yanke game da darajar wannan shaida na iya haifar da fahimtar da za ta shafi amincewar jama’a da kotun.Saboda haka, Omotosho ya ce ya ga ya dace ya janye kansa daga shari’ar, sannan ya umarci a mayar da kundin shari’ar ga Babban Alƙalin Kotun domin a sake ba wani alƙali ya ci gaba da sauraron shari’ar.
Lura: Zargin almundahana da kuma zargin sauya shaida ba su zama tabbacin aikata laifi ba; shari’a da bincike ne za su tabbatar da abin da ya faru da alhakin kowane wanda ake zargi.
