Kashim Ya Ziyar Tunubu A Legas Bayan Taron UN

Shettima ya ziyarci Tinubu a Legas bayan dawowarsa daga UNGA

Mataimakin Shugaban Ƙasa, Kashim Shettima, ya ziyarci Shugaba Bola Ahmed Tinubu a Legas bayan dawowarsa Najeriya daga birnin New York, inda ya wakilci shugaban ƙasar a Babban Taron Majalisar Ɗinkin Duniya na 81 (UNGA 81).

Shettima ya bar Abuja a ranar 20 ga Satumba, bisa umarnin Tinubu, domin jagorantar tawagar Najeriya zuwa taron Majalisar Ɗinkin Duniya. A yayin taron, ya gabatar da jawabin Najeriya a madadin shugaban ƙasa, inda ƙasar ta sake yin kira da a yi garambawul ga Kwamitin Tsaro na Majalisar Ɗinkin Duniya, ciki har da bai wa Afirka wakilcin dindindin.

Bayan ganawarsa da Tinubu a Legas, Shettima ya ce shugaban ƙasar ya kasance cikin tuntuɓar jami’an gwamnati akai-akai yayin da yake wajen Najeriya.

Ya ce ci gaban fasaha ya sauƙaƙa wa shugabanni ci gaba da gudanar da harkokin gwamnati ko da ba sa cikin Abuja. Ya bayyana cewa shi da Tinubu suna tattaunawa kusan kowace rana domin sanar da shugaban abubuwan da ke faruwa a ƙasar.

Shettima ya kuma yi magana kan manufofin tattalin arziƙin gwamnatin Tinubu, musamman janye tallafin man fetur da daidaita farashin canjin kuɗaɗe, yana mai cewa matakan sun kasance cikin manyan sauye-sauyen da gwamnatin ta ɗauka. Ya kuma amince cewa ’yan Najeriya na fuskantar wahalhalun tattalin arziƙi, amma ya ce gwamnati na shirin aiwatar da shirye-shiryen rage wa jama’a radadin matsin tattalin arziƙin.

Daga cikin shirye-shiryen da ya ambata akwai shirin e-logistics a Arewa maso Gabas, wanda zai ƙunshi samar da keken hawa masu amfani da lantarki 10,600, bas 300 da e-taxi, tare da wasu shirye-shiryen tallafa wa ɗalibai da sauran masu rauni a cikin al’umma.

Shettima ya kuma ce gwamnati za ta haɗa aikin mulki da harkokin siyasa yayin da ake tunkarar zaɓen 2027.

Ganawar ta zo ne bayan Tinubu ya koma Najeriya daga hutun aikinsa da ya yi a Turai, inda ya isa Legas a ranar 29 ga Satumba.